Moción de José Palacín en post da implantación dunha Plataforma de Participación para a Cidadanía.

       Eu, D. José Manuel Palacín y Rguez como voceiro de Converxencia 21, e  ao amparo do  Artigo 97.2 de Real Decreto 2568/1986 de 28 de Novembro de 1986 da ROFRXEL presento a seguinte Moción de Urxencia a esta Sesión Plenaria a celebrar o día 30 de xaneiro de 2020. 

Expoñendo que

Introdución.

A democracia naceu na antiga Grecia, pero non todas as polis gozaban deste sistema de goberno, no mellor dos casos, por exemplo en Atenas so se beneficiaban do privilexio da participación sobre o 30% dos habitantes da cidade, posto que metecos e escravos, e por suposto tódalas mulleres, quedaban excluídas. A moitos atenienses lles parecía suficiente pero uns visionarios como Pericles e Cimón pensaron que este dereito de participación podería ampliarse e reduciron aos excluídos. 

Ca era contemporánea xurdiron as primeiras democracias liberais en EE.UU, Francia, e Gran Bretaña, incluso co andar do tempo en España. Esa democracia empezou sendo censitaria (se votaba si se superaba unha renda), por tanto, pobres e mulleres non exercían o voto. A moitos individuos conservadores esa cantidade de democracia parecíalles suficiente pero algúns movementos libertarios pensaban que tiña que ampliarse o espectro de votantes.

Trala loita, a mediados do século XIX moitos países comezaron a superar as restricións, pero as mulleres seguían sen participar e algúns pensaban que iso era correcto e ía a quedar así para sempre, ata que as sufraxistas conquistaron os seus dereitos, e así alcanzamos o Sufraxio Universal desta Democracia Representativa. Moitos consideraron que esta Democracia Representativa era suficiente, e por tanto perpetua, sen embargo uns poucos utópicos proxectaron teorías que desembocaron na Democracia Deliberativa, na Democracia Participativa e incluso na Democracia Liquida que hoxe está tan en boga. 

Países como Suíza presentan doses de responsabilidade na toma de decisións por parte da cidadanía moi superiores as xa clásicas Democracias Representativas, entre as que figura a de España. Sen embargo, o nosa Constitución recoñece o dereito a participación directa, e incluso gran parte da normativa lexislativa periférica a potencia.

As entidades e administracións locais son o campo de probas por excelencia desta nova ofensiva pola liberdade e pola Democracia Total, por iso cada vez mais consistorios de España implementan ferramentas en pos desta conquista.

Os sofwares organizacionais que desenrolan plataformas virtuais de Participación Cidadán é son os instrumentos por excelencia dos Concellos para lograr unha maior transparencia e unha plena integración da cidadanía na toma de decisións.                             

      

Os cometidos dunha Plataforma son: 

a)  Desenrolo efectivo e normativo da participación directa da cidadanía, establecido no artigo 23 da Constitución Española e normativas de regulación tales como son a Lei 7/85 do 2 de abril que regula as Bases do Réxime Local e a Lei 57/2003 do 16 de decembro que procura a modernización dos Gobernos Locais.

b) Fomentar a transparencia e a colaboración social, facilitando a máis ampla información sobre os asuntos públicos, así como a comunicación bidireccional e interactiva entre a cidadanía e as súas asociacións, (ou sexa a sociedade civil)  e as estruturas administrativas municipais, así como axudar a enriquecer o tecido asociativo relacionado cos asuntos públicos.

c) Garantir o acceso dos cidadáns as estruturas e recursos municipais e posibilitar a súa implicación na xestión dos equipamentos, actividades e decisións municipais.

A Plataforma de Participación para a Cidadanía é unha impulsora dos dereitos dos cidadáns:

Todo cidadán ten dereito a información, participación, colaboración: 

-   Dereito a participar nas sesións.

-   Dereito a Consulta Popular ou Referendum Local.

-   Dereito a colaborar.

-   Dereito a dirixir solicitudes e propostas.

-   Dereito a presentar queixas, reclamacións ou suxestións.

-   Dereito a unha Iniciativa Popular.

-   Dereito a participar en decisións colectivas.

-   Dereito a Intervención nos Plenos Municipais.

-   Dereito a reunión e asociación.

-  Dereito a rexistrar asociacións sendo declaradas de utilidade municipal, contemplando tamén o dereito das asociacións e plataformas sen personalidade xurídica.

-    Dereito de acceso a axudas e subvencións.

-   Dereito a convenios de colaboración.

-   Dereito de uso dos medios e instalacións municipais

E mais dereitos que omitimos para no elevar esta moción a enésima potencia do infinito.

No Concello de Tui moitos destes dereitos está cubertos pola normativa do Réxime da Administración Local, pola atención do funcionariado nos seus distintos departamentos administrativos, polos representantes públicos dos diferentes grupos municipais, por determinadas ferramentas e medios de comunicación como a páxina web e as redes sociais do Concello, e especialmente pola labor inestimable da nosa Radio Municipal, existe incluso unha aplicación de incidencias ou un buzón de suxerencias …pero existen outros dereitos como a participación nas decisións colectivas ou sobre todo as enquisas ou as consultas populares que carecen dunha ferramenta eficaz e acorde aos tempos actuais.

Por iso, consideramos que para alcanzar ese estatus de visionarios, de emprendedores da democracia debemos implantar un sofware que implemente unha plataforma virtual de participación.  

Por exemplo, agora que se está a artellar a transformación no trafico rodado, este instrumento houbera sido útil para coñecer a opinión dos tudenses de forma anónima  e dende logo libre.

Os cidadáns non son clínex de usar nas Eleccións e tirar ao esquecemento das súas responsabilidades e dereitos durante catro anos, acaparando o Sr. Excelentísimo Alcalde ou os 17 representantes municipais de maneira drástica o poder de decisión absoluto.          

Por iso, dende C21 desexamos dar un paso máis na cantidade e na calidade da democracia ao servizo dos individuos e da sociedade. Non sabemos a ciencia certa se sería bo ou malo converterse nun paraíso fiscal pero do que si somos conscientes e de que debemos converternos nun paraíso democrático.              

Polo tanto, apoien o acordo para crear unha aplicación sofware que funcione como plataforma virtual de participación cidadán.       

José Manuel Palacín

Concelleiro de C21